పినపాక ఆసుపత్రుల అభివృద్ధికి ఎమ్మెల్యే పాయం వినతి

పినపాక ఆసుపత్రుల అభివృద్ధికి ఎమ్మెల్యే పాయం వినతి

హైదరాబాద్, మన భద్రాద్రి న్యూస్, జూలై 15

పినపాక నియోజకవర్గంలోని ప్రభుత్వ ఆసుపత్రులు, ప్రాథమిక ఆరోగ్య కేంద్రాలు, సామాజిక ఆరోగ్య కేంద్రాల్లో వైద్య సేవలను మరింత బలోపేతం చేసేందుకు అవసరమైన సిబ్బంది, మౌలిక వసతులు, వైద్య పరికరాలు, నిధులను మంజూరు చేయాలని పినపాక ఎమ్మెల్యే పాయం వెంకటేశ్వర్లు రాష్ట్ర వైద్య, ఆరోగ్య, కుటుంబ సంక్షేమ శాఖ మంత్రి దామోదర రాజనర్సింహను కలిసి వినతిపత్రం సమర్పించారు.

ఈ సందర్భంగా ఎమ్మెల్యే మాట్లాడుతూ, పినపాక నియోజకవర్గం గిరిజన, అటవీ, గ్రామీణ, పారిశ్రామిక ప్రాంతాలతో కూడిన ప్రత్యేక నియోజకవర్గమని, వేలాది మంది ప్రజలు ప్రభుత్వ ఆసుపత్రులపైనే ఆధారపడి వైద్య సేవలు పొందుతున్నారని తెలిపారు. అయితే వైద్యులు, నిపుణులైన వైద్య సిబ్బంది, నర్సులు, ఇతర సిబ్బంది కొరతతో పాటు పలు ఆసుపత్రుల్లో మౌలిక వసతుల లేమి కారణంగా ప్రజలు ఇబ్బందులు ఎదుర్కొంటున్నారని మంత్రి దృష్టికి తీసుకెళ్లారు.

మణుగూరు వంద పడకల ఏరియా ఆసుపత్రి, బూర్గంపాడు సామాజిక ఆరోగ్య కేంద్రం, మణుగూరు, గుండాల, కరకగూడెం, మొరంపల్లి బంజర, ఆళ్లపల్లి, జానంపేట ప్రాథమిక ఆరోగ్య కేంద్రాల అభివృద్ధికి సంబంధించిన సమగ్ర ప్రతిపాదనలను మంత్రికి అందజేశారు.

వైద్యులు, నిపుణులైన వైద్య సిబ్బంది, నర్సులు, ఔషధ నిపుణులు, ప్రయోగశాల సాంకేతిక సిబ్బంది తదితర ఖాళీల భర్తీతో పాటు, అత్యవసర చికిత్స విభాగం, చిన్నారుల వార్డు, బయటి రోగుల నిరీక్షణ షెడ్లు, అదనపు పడకలు, అంబులెన్స్, మృతదేహ రవాణా వాహనం, వైద్య పరికరాలు, ఉప ఆరోగ్య కేంద్రాల భవనాలు, ప్రహరీ గోడలు, పెండింగ్ నిధుల విడుదల, అవసరమైన చోట ప్రాథమిక ఆరోగ్య కేంద్రాలను సామాజిక ఆరోగ్య కేంద్రాలుగా అభివృద్ధి చేయాలని వినతిపత్రంలో కోరారు.

ప్రజలకు మెరుగైన వైద్య సేవలు అందించేందుకు సమర్పించిన ప్రతిపాదనలను సానుకూలంగా పరిశీలించి, అవసరమైన పరిపాలనా, ఆర్థిక అనుమతులు మంజూరు చేయాలని ఎమ్మెల్యే విజ్ఞప్తి చేశారు.

మంత్రి దామోదర రాజనర్సింహ ప్రతిపాదనలను పరిశీలించి, సాధ్యమైనంత త్వరగా అవసరమైన చర్యలు తీసుకుంటామని ఎమ్మెల్యేకు హామీ ఇచ్చారు.