రోజుకు 10,000 అడుగులు నడవడం అనేది ఆరోగ్యానికి పరమావధిగా మారిపోయింది. ఫిట్నెస్ బ్యాండ్లు, స్మార్ట్ఫోన్లల్లో ఉండే టూల్స్ ఆధారంగా ఈ సంఖ్యను చేరుకోవడానికి ఇష్టపడుతున్నారు యువత. ప్రతి మనిషి శరీరం ఒకేలా స్పందించదు. ఒకరికి ఉత్సాహాన్నిచ్చే నడక, మరొకరి మోకాళ్లు, నడుముకు తీవ్ర నష్టాన్ని కలిగించవచ్చు. అందుకే ఈ సంఖ్యను గుడ్డిగా నమ్మకూడదని వైద్య నిపుణులు హెచ్చరిస్తున్నారు.
యూరోపియన్ జర్నల్ ఆఫ్ ప్రివెంటివ్ కార్డియాలజీ పరిశోధనల ప్రకారం, రోజుకు కేవలం 4,000 అడుగులు నడిచినా అకాల మరణాల ముప్పు చాలా వరకు తగ్గుతుంది. రోజుకు 10,000 అడుగులు నడవాలనేది ఒక అపోహ మాత్రమేనని, నడక మంచి వ్యాయామమే అయినప్పటికీ, శరీరం, కీళ్ల ఆరోగ్యంపై ఆధారపడి అడుగుల సంఖ్యను మార్చుకోవాల్సి ఉంటుందని నిపుణులు సూచిస్తున్నారు.
కీళ్ల నొప్పులకు దారితీసే 10,000 అడుగుల లక్ష్యం
శారీరక శ్రమ లేకుండా ఉన్నపళంగా రోజూ 10,000 అడుగులు నడవడం ప్రారంభించే వారిలో మోకాళ్లు, చీలమండలు, నడుముపై తీవ్ర ప్రభావం పడుతుంది. ముఖ్యంగా ఊబకాయం, కీళ్లవాతం, ఫ్లాట్ ఫీట్, బలహీనమైన కండరాల సమస్యలు ఉన్నవారికి ఇది మరింత ప్రమాదకరం. ఉదయం లేవగానే మడమ నొప్పి, మోకాళ్ల వాపు, మెట్లు ఎక్కేటప్పుడు ఇబ్బంది వంటి సంకేతాలను శరీరం పంపే హెచ్చరికలుగా గుర్తించాలి తప్ప, ఫిట్నెస్ పురోగతిగా భావించకూడదు. అతిగా శ్రమించడం వల్ల కలిగే నష్టాల గురించి నిపుణులు మరిన్ని విషయాలు వెల్లడించారు. వ్యాయామం లేని జీవనశైలి నుండి ఒక్కసారిగా రోజూ 10,000 అడుగుల లక్ష్యానికి మారడం వల్ల మోకాళ్లు, చీలమండలు తీవ్ర ఒత్తిడికి లోనవుతాయని చెబుతున్నారు. అమెరికా సీడీసీ (CDC) నివేదికలు కూడా క్రమంగా శారీరక శ్రమను పెంచడమే సురక్షితమైన మార్గమని స్పష్టం చేస్తున్నాయి.
మహిళలకు నడకలో ప్రత్యేక జాగ్రత్తలు అవసరం
మహిళల హార్మోన్ల మార్పులు కీళ్ల ఆరోగ్యంపై ప్రభావం చూపుతాయి. మహిళల్లో హార్మోన్ల మార్పులు కీళ్ల స్థిరత్వాన్ని ప్రభావితం చేస్తాయి. గర్భధారణ, ప్రసవానంతరం లేదా మోనోపాజ్ సమయంలో తగిన జాగ్రత్తలు లేకుండా అతిగా నడవడం వల్ల పెల్విక్ నొప్పి మరియు కీళ్ల నొప్పులు వస్తాయని డాక్టర్లు పేర్కొంటున్నారు. అందుకే మహిళలు తమ శరీర స్థితికి తగినట్లుగా నడక అలవాటు చేసుకోవాలి.
సురక్షితమైన నడక కోసం రోజుకు 3,000 నుండి 4,000 అడుగులతో ప్రారంభించి క్రమంగా దాన్ని 10,000 అడుగుల వరకు పెంచుకోవచ్చు. నాణ్యమైన స్పోర్ట్స్ షూస్ ధరించడం వల్ల కీళ్లపై ఒత్తిడి పడకుండా చూసుకోవచ్చు. కాంక్రీట్ రోడ్ల కంటే సాఫ్ట్ ట్రాక్లు లేదా పార్కులలో నడవడం ప్రయోజనకరం. రోజంతా ఒకేసారి నడవడానికి బదులుగా, చిన్న విరామాలతో కూడిన నడక శ్రేయస్కరం. నడకతో పాటు కండరాల బలోపేతానికి తగిన వ్యాయామాలు (స్ట్రెంత్ ట్రైనింగ్) చేయడం మోకాళ్లకు రక్షణగా నిలుస్తుంది. నడక అనేది మన శరీరాన్ని ఆరోగ్యంగా ఉంచడానికి ఉపయోగపడాలి కానీ, స్మార్ట్వాచ్ లేదా ఫిట్నెస్ యాప్లు ఇచ్చే శిక్షగా మారకూడదు. ప్రతి ఒక్కరూ తమ దేహ దారుఢ్యాన్ని బట్టి అడుగుల సంఖ్యను నిర్ణయించుకోవడం అవసరం. కీళ్ల ఆరోగ్యం అనేది సురక్షితమైన, స్థిరమైన, క్రమబద్ధమైన అలవాట్లతోనే సాధ్యమవుతుంది.
అలాగని.. 10,000 స్టెప్పుల మీద వాక్ చేయడం వల్ల లాభం లేకపోలేదు. శరీరం రోజంతా తాజాగా, ఉల్లాసంగా ఉంటుంది. మెదడు చురుగ్గా పని చేస్తుంది. ఊబకాయం గానీ, బొజ్జ గానీ వచ్చే ప్రమాదం చాలా వరకు తగ్గుతుంది కూడా. కాలి కండరాల ఆరోగ్యం మెరుగుపడుతుంది. పిక్కలు గట్టిపడతాయి. అనాయాసంగా సుదూర ప్రాంతాల వరకు నడక సాగించవచ్చు. దీనికి తగ్గట్టుగా తమ శరీరాన్ని మార్చుకోవాల్సి ఉంటుందని నిపుణులు సూచిస్తున్నారు.
